॥ श्री गणेशाय नमः ॥
राहुस्तोत्रम्
॥ ॐ नमो राहवे ॥
नमस्ते दैत्यरूपाय देवारिं प्रणमाम्यहम् ।
नमस्ते सर्वभक्ष्याय घोररूपाय वै नमः ॥ १ ॥
त्वं ब्रह्मा वरुणो देवस्त्वं विष्णुस्त्वं हरिः शिवः ।
मर्त्यलोके भवान्प्रीतः संसारजनतारकः ॥ २ ॥
कूटपर्वतदुर्गाणि नगराणि पुराणि च ।
यस्य क्रोधवशाद्भस्मीभवन्ति क्षणमात्रकम् ॥ ३ ॥
धूम्रवर्णो भवान्राहू रक्ताक्षः पिङ्गलोपमः ।
क्रूरग्रहस्तथा भीमो यमरूपो महाबलः ॥ ४ ॥
यस्य स्थाने पञ्चमेऽपि षष्ठे चैव तृतीयके ।
दशमैकादशे चैव तस्य श्रेयः करोत्यलम् ॥ ५ ॥
अन्नं खड्गं च यद्दत्तं राहवे सुफलप्रदम् ।
पृथिव्यां ब्रह्मपीडां च गोपीडां तन्निवारयेत् ॥ ६ ॥
कृमिकीटपतङ्गेषु चरन्तं सचराचरम् ।
गोदानं भूमिदानं च ह्यन्नं वस्त्रं च दापयेत् ॥ ७ ॥
सौवर्णरौप्यदानं च कन्यादानं च तत्क्षणात् ।
एतद्दानं च सम्पूर्णं राहुमोक्षकरं नृणाम् ।
अस्य स्तोत्रस्य माहात्म्याद्राहुपीडा विनश्यति ॥ ८ ॥
रक्ताक्षो धूम्रवर्णाभो विजितारिर्महाबलः ।
अबाहुश्चान्तरिक्षस्थः स राहुः प्रीयतां मम ॥ ९ ॥
इति राहुस्तोत्रं सम्पूर्णम् ॥
॥ ॐ श्यामाशिवभ्यां नमः ॥